Өткенде отырып осы жылдың үйлену тойларын санап шыққан едім. Сонда осы жылы бір-екі емес, 16 (!!!) той бар болып шықты. Уау! 2007 жыл – тойларға берекелі жыл! Сурет түсіргенді жақсы көретін мен үшін үйлену тойларға барғанымда маңызды көріп, үнемі 3 нәрсені міндетті түрде суретке тартамын: жас жұбайлардың мерекелік көліктері, жас жұбайлардың вальс биі мен мерекелік торт!
Өткен аптаның демалыс күндері бір емес екі тойға барып қайттық, сол тойлардың сарқыты жоғарыдағы торттар. Бірінші торт – пысық десе пысық, ақылды десе ақылды Әлия қызымыздың ұзатылу тойынан түсірілді. Екінші торт – ертеңіне Тараз қаласына барып, инабатты да жұмсақ мінезді Айжан қызымыздың үйлену тойында түсірген едім. Қыздардың жаңа өмірлері осы торттардай тәтті әрі әдемі болуына тілектеспін! Бақытты болыңдар, жас арулар!